20 حاجة تعملهم عشان تذاكر بنِفس .. وتبقى مذاكرتك فعّالة..

20 حاجة تعملهم عشان تذاكر بنِفس .. وتبقى مذاكرتك فعّالة..
--
1- هتجيب ورقة بيضا .. وتقسمها بالنص.. النص اليمين.. تبدأ تكتب أسامي المواد اللي عندك.. وما بين كل مادة ومادة هتسيب 5 6 سطور فراغ .. وتبدأ مع كل مادة.. تشوف إيه اللي اخدته ولسه مذاكرتهوش.. المحاضرات بالسكاشن بالشيتات بتاعتها ببابا غنوجها :D ..
وتكتبه .. مثلًا.. محاضرة1 .. وبعديها ف سطر تاني.. محاضرة 2 .. بلاش تكتب محاضرة 1,2,3 ورا بعض (هقولك ليه دلوقتي) ..
هتملى كل المواد ..
ع الشمال بقى هتحط الأيام اللي باقية على الامتحان أو المدة اللي ناوي تلم فيها الليلة دي..

2- سيادتك هتلاقي عليك كم كبير فحت .. وهتبدأ تحس إنك كنت بتدلع ويارتني ذاكرت من الأول ومفيش وقت أخلص كل ده.. إلخ من كل الإحباطات اللي عقلك بيبثهالك .. رقم 1 مش جدول مذاكرة زي اللي بتعملهم ومتطبقهمش .. رقم 1 هدفها إنك تعرف عليك أد إيه مفروض تخلصه.. بحيث يبقى هدف توصل إنك تخلصه لإن لو سبتها بالحب مش هيكون الأمر مُجدي .. وهدفها إنك تحس إن عليك كم كبير! .. وهم ما يتلم .. بس الخطوة دي مهمة لإنها هي اللي هتحمسك هتعرف ليه كمان شوية..
هتوزع بقى اللي ع اليمين ده ف الايام اللي ع الشمال.. كل يوم شوف انت هتاخد إيه فيه .. واكتبه بالتفصيل.. محاضرة كذا مادة كذا .. شيت كذا .. وهنزل الصبح ارجع البيت من الكلية الساعة كذا وابدأ ..
حاول تراعي الوقت .. الكلام ده من غير وقت ملهوش أي لازمة.. متحطش حاجات بالعبيط في وقت صغير لإن مش هتخلصهم .. ومتحطش حاجات هبله لا تتماشى مع الهم اللي ما يتلم ده :D

3- معلش استحملني.. هلغبطلك نظام يومك شوية.. خش هنا: http://goo.gl/DlJAhj
حاول الكام يوم دول تعمل فيهم التحدي ده .. هتنام من 10 بليل أو 11 وتقوم الفجر ..
(خلي بالك إنت بتهيأ عقلك إنك بتعمل حاجة مهمة وهي المذاكرة .. ف أرجوك كن على قدر الحدث، وأهي حاجة جديدة وصدقني هتحس بنشاط وفرق كبير في يومك وحياتك المملة الموخمة :D ) ..

4- خلاص كده .. حطينا الخطة .. ظبطنا ميعاد نومنا .. يلا بينا.... لأ .. استنى.. هتحضر شوية مقبلات للعقل كده قبل ما تخش تقعد تذاكر ..

5- هتجيب قماشة .. وتبلها ماية .. وتيجي ع المكتب بتاعك .. تشيل من عليه كل حاجة ..
وتمسح المكتب بنفسك (إنت بتهيأ نفسك وتديها إحساس إنك هتقعد على نضافة :D ) .. حتى لو المكتب ممسوح كويس..
هتبتدي ترتب الحاجات اللي ع المكتب.. المقلمة ع اليمين والآلة الحاسبة جمبها.. اللاب ع الشمال.. مكان لكوباية ..

6- هتجيب كل حاجة عاوز تذاكرها كلها جنبك .. كلها .. وخلي بالك م التفاصيل عشان الشيطان شاطر.. يعني ممكن متذاكرش مثلا وتحلف طلاق بيمين.. انك مش مذاكر عشان الجومة مش لاقيها .. مع إنك بتذاكر من الـ Pdf اصلا ومش عاوز جومه ف حاجة دلوقتي.. بتحصل .. :D
حاجتك جنبك كلها ..

7- عندك بقى شوية مشاريب كدة لازم تجربها لزوم القعدة الصح والدماغ العالية:
قرفة - قرفة باللبن - قرفة بالزنجبيل - نعناع - نعناع بالقرنفل - أي نوع عصير .. طبعًا قهوة ونسكافية وشاي وكابتشينوا وكاكاو(وفي أقوال أخرى: Hot Chocolate) وياريت والنبي شوية حمص جنبك عشان بيقوي الذاكرة .. وعبيلوا وإديلوا ..
بس وقفة بسيطة هنا.. النعناع ده تشربه من قبل الامتحانات بـ 3 أيام كل يوم لحد الامتحانات ولحد ما تخلصها .. لإنه مهدئ للاعصاب .. مش هيخليك متوتر خالص حتى لو لسه مخلصتش حاجة :D .. وبيمسك البطن ويحسسك إنك متزن نفسيًا كده, وبرنس ف نفسك وبتلعب بيس مع اخوك ومقطعه ليلة الامتحان والناس ف جروب الدفعة عمّالين يصوتوا..

8- لو بتحب تسمع حاجة وانت بتذاكر... هتظبط واحد بلاي ليست كده عنب ..
خش هنا (وكسبني ثواب :v ): http://goo.gl/XOhh1U
وشغل كل الحاجات اللي عندي .. أقصد جهزها عندك أو نزلها .. احنا لسه كل ده مبدأناش :D
ويُفضل بقى المقطعين دول: 1- http://goo.gl/o5LAsN
2- http://goo.gl/jXwQZP
عشان دول بيفتحوا الشهية على المذاكرة وبيهدوا الأعصاب جدًا ..
ويا سلام لو ع الصبح كده بعد الفجرمقطع الشيخ رفعت ده: http://goo.gl/PaBiug

9- هتطبق الـ Technique اللي في اللينك ده بحزافيره زي ما مكتوب بالخطوات كدة وتخليه كويس في دماغك:http://goo.gl/vUVz5W ..
وأهم حاجة ،، الـ Process مش الـ Product ..
والاهم من كل ده .. الـ Break ..

10- مكتبك متظبط.. قافل عليك أوضتك.. كوبايتك جنبك مليانه.. البلاي ليست متظبطة.. حاجتك كلها جنبك.. جدولك العتيد متعلق..
- يلا بينا ..
* لأ .. ثانية واحدة بس .. هبص ع الفيس بصة بسرعة والله قبل ما أبدأ.. ع السريع كدة .. فسوة..
- آااه.. هو انت متعرفش
*اعرف إيه؟
- مهو اتقفل .. مش هيفتح
* o.O
- ما انت نزلت Stay Focused من هنا: http://goo.gl/I2KuF3
وقومت وانت مش واخد بالك ظبطت ان الفيس يتفتح من الساعة 9 ونص لـ 10 بليل بس قبل ما تنام :D
:D
* ...
- متبصليش كدة! الامتحان كمان اسبوع ولازم تجيب درجة عدلة عشان تطلع من أم البلد دي.. :D

11-
* طب يلا نذاكروا بقى :D ..
- بس ثواني بس .. ثواني .. هتذاكر على إيه؟
* آه صح :D .. معيش ورق فاضي اكتب فيه ..
- بص .. انزل جيب رُزمة ورق ابيض مسطر من أي مكتبة .. وجيب اقلام الوان .. بص.. اقلب بنت الاسبوع ده .. عاوزها لوحة رسم .. وذاكر بورقة وقلم زي ايام ثانوي :D

12- مكتبك متظبط.. قافل عليك أوضتك.. كوبايتك جنبك مليانه.. البلاي ليست متظبطة.. حاجتك كلها جنبك.. جدولك العتيد متعلق.. ورقك الابيض .. اقلامك الألوان ..
اخبط واحد بومودورو فحيت ..
مبروك .. الخمس دقايق دول بقى ممكن تقلع وتبقى بالحمالات .. وتقف في البلاكونة بعلو صوتك تقول عاااااا .. زي الأستاذ حمبولة في مقطعه الشهير بتاع: قول عااااا :D

13- حاول بقى وانت بتذاكر .. في أوقات البريك..
تنزل ضغط .. تنزل تصلي وتيجي .. تقوم تعمل لنفسك حاجة تشربها من رقم 7 ..
- تشوفلك فيديو من Ted من هنا: http://goo.gl/gz90C0
وياريت وحياة والدك تركز على الـ Motivational Talks ..
- ممكن تشوفلك فيديو من Minute Physics : http://goo.gl/F7WdPq
- أو من البرنس Vsauce : http://goo.gl/G7m52L
- أو تخبطلك حاجة في الأدب العربي من الشيخ سعيد الكملي من هنا: http://goo.gl/ZLwpID

14- بعد ما تخلص التاسك بقى.. هتجيب الجدول الحلو اللي عملته فوق.. وبالقلم الأحمر.. تشطب على اللي خلصته.. ده هيديلك حماس وطاقة .. كل بقى أما تخلص حاجة اشطب عليها ..
هتحس إنك بتنجز كده وبتعمل حاجة بدل ما انت كنت بطيخة ..
(وكنا حطيناهم تحت بعض عشان تحس إنهم ياما وانت بتنجز.. آه معلش :D)

15- حاول تحافظ على حاجتين.. (الحاجتين دول عملتهم وانا ف ثانوي وجبت 99 وشوية بسببهم):
- الصلاة على وقتها.. (بالأخص الفجر).
- بر الوالدين.

16- حاول بقى المواد اللي محتاجة حفظ وملهاش لازمة.. تشتغلها مع 3 صحابك .. او 2.. مش زيادة عن كدة.. هتبدوا تحفظوا بس بطريقتكم الخاصة.. مثلا مثلا.. كان عندنا مادة علم نفس كدة واحنا اصلا في هندسة والمادة نفيخة بالنسبالنا عشان الحفظ.. وكان علينا أنواع امراض نفسية نحفظها عشان هنخش الامتحان نسمعها.. قعدنا.. قسمنا الأمراض علينا.. كل واحد كإن عنده المرض ده.. وفضلنا نطلع فيه القطط الفطسانة .. اللي بتتماشى مع المرض ده ونفتكرها بمواقف.. وعشان نحفظ الترتيب مثلا ناخد أول حرف من كل كلمة ونشكل كلمة .. وهكذا.. والموضوع هيبقى ساهل ولذيذ ..

17- المواد اللي محتاجه حفظ جامد بقى ولازم متتنساش خالص ولازم متترماش.. في حاجة اسمها Memory Palace
خش ع جوجل اكتبها وشوف بتتطبق ازاي وطبقها.. مش لازم أدلعك واجيبلك اللينك لحد عندك -_- :D
وحاول تخلي وقت الحفظ.. بعد الفجر ..

18- لو نظمت وقتك هت لاقي عندك شوية وقت ممكن تعمل فيهم حاجة تفك الملل..
دول 40 حاجة اعمل منهم أي حاجة .. والملل ده هيروح :) :http://goo.gl/K3wVv0

19- من أهم الأشياء.. إنك تساعد حد مش فاهم حاجه تفهمهاله.. بيسأل سؤال ع جروب الدفعة تجاوبه..
محاضرة مش موجودة تنزلها للناس.. صدقني الوقت اللي هتخدم فيه الناس ده .. هتشوفه بركتة في وقت الامتحان ..

20- وانت بتصلي كدة افتكر البوست ده وادعيلي جامد عشان ورايا همّ ما يتلمّ .. وهندسة والعيشة مرة

ودمتم :)